- هي سنة 2020 مش عايزه تختم الا بحاجه عظيمه 😍
= ليه ايه اللي هيحصل فينا تاني مش كفايه العظمه اللي احنا شايفنها دي 😏😏
- يا عم ماتقلاقش دي حاجه حلوه خود مني بس
= طب لما نشوف
- يا عم ماتقلاقش دي حاجه حلوه خود مني بس
= طب لما نشوف
تعالي بس ندردش مع بعض في شوية حاجات كده في الأول
احنا عارفين ان الكواكب هي اجسام معتمه (معلومات بديهيه) بس بنفس طريقة انعكاس ضوء الشمس علي القمر احنا بنقدر نشوف الكواكب في السماء، بمعني ان اشعة الضوء هتوصل للكواكب و تنعكس لينا و ساعتها هنقدر نشوفه في السماء.
من الكواكب بقي اللي سهل اننا نرصدها في سماء الليل بعنينا من غير تليسكوب هي:
كوكب الزهره (Venus) و هو يعتبر المع جسم بعد الشمس و القمر
و طبعا جارنا اللي عليه كلام كتير كوكب المريخ (Mars)
أقرأ ايضا: سر استكشاف المريخ
و العملاق الغازي اللي بيحمي الأرض و كواكب المجموعه الداخليه كلها من اغلب الكويكبات و النيازك اللي ممكن تصطدم بيه كوكب المشتري (Jupiter)
أقرأ ايضا: لماذا كوكب المشتري ليس نجم
و اخر واحد تقدر تشوفه هو كوكب زحل (Saturn) بس عشان تقدر تشوف حلقاته اللي مميز بيها هتحتاج تلسكوب للأسف
= طب تمام و بعدين بقي 👀
- اصبر يا حبيبي اهدي كده مالك مستعجل ليه 😒😒
= حاضر 😔😔
العظمه بقي اللي هنتكلم عنها و هنختم بيها السنه دي هو اقتران كوكبي زحل و المشتري و اللي بنسميه الاقتران العظيم
طبعا انت هتسالني يعني ايه اقتران أصلا؟؟
بص يا سيدي الاقتران هو ان يكون عندنا جسمين في السماء خط واحد و أحيانا بيكونوا علي مسافه قريبه جدا جدا من بعض للدرجه اللي تخليك تشوفهم كأنهم نقطه في السماء.
و الاقتران ده بيبقي حدث عادي جدا لأنه بيحصل ظاهريا لينا بالنسبه لموقع الأرض و الاجسام اللي بنرصدها من سمائه، و بيبقي عندنا نوعين من الاقترانات هما الاقتران الداخلي (Interior Conjunction) و هنا بيكون الجسم المرصود ما بين الشمس و الأرض و الحاله دي مش بتحصل الا مع كوكبين بس و هما عطارد و الزهره و النوع التاني من الاقترانات هو الاقتران الخارجي (Inferior Conjunction) و النوع ده بيحصل مع كل الكويكبات و الكواكب البعيده عن الشمس.
الاقتران اللي احنا مستنينه و اللي هنختم بيه 2020 هو اقتران العملاقين الغازين كوكبي زحل و المشتري و بنسميه الاقتران العظيم و هيحصل يوم 21 ديسمبر من الحاجات بقي اللي مخليانا كمتابعين لسماء الليل مهتمين اوي بالاقتران ده انه مش بيحصل علي طول و انه عشان نقدر نشوفه تاني هنستني سنة 2080 فده اكتر سبب يخليك تقوم و تبص للسماء من النهارده لحد يوم 21 و تشوف الكوكبين و هما بيقربوا لبعض بالتدريج فمنظر جميل لحد ما يوصلوا انهم يبقوا متطابقين و يبانوا كنقطه واحده مضيئه في سماء الليل.
 |
| زحل والمشتري اثناء اقترابهم من بعضهما البعض مع اقتراب الاقتران العظيم في 21 ديسمبر (المسافة الظاهرة تعطى بالدرجات والدقيقة) |
تعليقات
إرسال تعليق