سر استكشاف المريخ

صورة لكوكب المريخ مع ظهور واضح لوادي مارينز في منتصف الصوره

يوم 20 يوليو اللي فات دولة الامارات طلعت مسبار للمريخ، وكمان يوم 30 يوليو ناسا طلعت مهمة "Mars 2020" ، طبعا السؤال اللي هيجي في دماغك ايه هو سر الاهتمام بالمريخ اوي للدرجه دي تعالي اقولك يا سيدي بس خود المعلومه دي معاك في السكه.

يعني ايه مسبار:

بص يا سيدي المسبار ده هو مركبه فضائيه غير مأهوله بيتم ارسالها للفضاء لأجراء بحوث و اننا نحصل علي صور و معلومات عن الكواكب و الأقمار و المذنبات اللي موجوده في نظامنا الشمسي و بنقدر بالمسبار ندرس الكواكب و الأقمار اللي احنا عايزنها من غير ما نخاطر اننا نرسل أي انسان لبيئيه مجهوله و غير معروفه فبالمسبار بنقدر نفهم اكتر و نعرف اكتر عن الحاجه دي بحيث لما نرسل رحالات مأهوله للمكان ده نتفادى أي خطر علي الرحله المأهوله.

المريخ (الكوكب الأحمر):

المريخ هو رابع كوكب في نظامنا الشمسي و هو من الكوكب الصخريه ، طبعا عشان انت شخص بتحب تسال كتير هتسال و تقول هو ليه لقبه الكوكب الأحمر الاجابه هي بسبب ان لونه للراصد بيبقي مائل الاحمرار بسبب نسبة غاز أكسيد الحديد الثلاثي العاليه جدا علي سطحه و في جوه.

المريخ ليه قمرين الأول اسمه ديموس و الثاني اسمه فوبوس و هما أقمار صغيره غير منتظمة الشكل، و بيتمتع بغلاف جوي رقيق بيوفر ليه الحماية من الإشعاعات الكونية والشمسية بيتكون من ثاني أكسيد الكربون و النيتروجين و الارجون و مجموعه من الغازات الأخرى، و درجة حراره سطحه الكبري هي 27 درجة مئويه و الصغرى -133 درجة مئوية.

من الحاجات المميزه للمريخ انه بيمتلك فصول سنه مطابقه لفصول السنه الاربعه علي الأرض و ده لان فترة دورانه حول نفسه و ميل محوره مماثل للأرض بشكل كبير، ده غير ان اليوم الواحد على كوكب المريخ بيساوي حوالي 24 ساعة و39 دقيقة، في حين أن اليوم الواحد على الأرض بيساوي حوالي 23 ساعة و56 دقيقة.

مش بس مناخ المريخ هو الي مميز لا كمان تضاريسه هي اللي مميزه و ده لأنه بيمتلك اكبر جبل و بركان في المجموعه الشمسيه كلها و اسمه أوليمبس مونز تيمنا بجبل الأولمب ،كمان فيه وادي مارينر واللي بيعتبر واحد من أكبر الأخاديد في المجموعة الشمسيه.

أقرء ايضا: كوكب المشتري | لماذا كوكب المشتري ليس نجم 

صوره بانوراميه لسطح المريخ التقطتها مركبة ابورتيونيتي

استكشاف المريخ:

علي مدار ال 60 سنه الاخيره حصل تقريبا 44 محاوله لاستكشاف المريخ و كانت الرحلات دي تابعه للولايات المتحده و للاتحاد السوفيتي و وكالة الفضاء الأوروبية و الهند، و الهدف الرئيسي من كل الرحلات دي هو استكشاف الكوكب و احتمالية وجود او نشأة حياه عليه ده كهدف اولي زائد معرفة هل كان في حياه علي الكوكب قبل كده ولا لأ، و لو كان فيه ايه هو السبب اللي خلي الكوكب غير صالح للحياه بالشكل ده ، و لو في احتمالية حياه عليه هل هنقدر نصمد في بيئته القاسيه دي.

من اهم أسباب التسارع ورا استكشاف المريخ هو الإجماع العالمي علي قضية الكثافة السكانية على كوكب الأرض، واللي بيتوقع أنها تؤدي إلى استنفاذ سريع للموارد الطبيعية، وانقراض أنواع من الحيوانات بالكامل ؛ و دي حاجه بتهدد الجنس البشري نفسه، علشان كده أصبح البحث عن كوكب بديل يمكن للبشر الاستقرار عليه امر لا مفر منه.

وشكل التشابه بين كوكبي المريخ والأرض اللي اتكلمنا عنه والقرب النسبي بينهما بمتوسط مسافة 225 مليون كيلومتر من اهم الأسباب اللي خلت الكوكب الأحمر مرشحا رئيسا للاستكشاف وهدف للدراسة باعتباره كوكب محتمل للعيش فيه مستقبلا.

و بتركز مهمة " Mars 2020" على البحث عن آثار حياة سابقة على المريخ بس العلماء بيعتبروا أن عندهم أدلة تثبت ان الكوكب كان قبل ثلاثة مليار سنة أكثر دفئا وتجري فيه الكثير من الأنهر والبحيرات وهي مكونات أدت على الأرض إلى وجود حياه ، لكن الكوكب الأحمر تحول بعد كده الي كوكب بارد وجاف لسبب لسه علماء الكواكب يجهلونه.

و من الحاجات الجديده اللي ناسا هتحققها في الرحله دي انها هتقدر تجمع عينات من صخور الكوكب و هترجع الي الأرض في مهمه امريكيه اوربيه هتوصل للأرض سنة 2031 علي اقل تقدير ، و بيعتبر علماء ناسا ان الدليل القاطع بوجود حياه في الماضي علي المريخ مش هيتم تأكيده غير بعد تحليل العينات دي.

سطح المريخ في وضعه الحالي مش بيدعم أي حياة عليه، غير أن متوسط درجة الحرارة مش عالي بوجود الحلول الواقية للبشرة زى بدل الفضاء للحماية من الاشعه الضاره، ده كمان زائد أن تربته تحتوي على المياه اللي ممكن استخراجها، كمان هناك قدر كافي من ضوء الشمس يصلح اننا نعتمد عليه كمصدر للطاقة باستخدام الألواح الشمسية.

عاجل:

اكتشاف عنصر الفوسفين في الغلاف الجوي لكوكب الزهره مما يدل علي احتمالية وجود حياة عليه.


يتبع….