كوكب المشتري | لماذا كوكب المشتري ليس نجم

 ليه كوكب المشتري مش نجم ؟!؟!؟

كوكب المشتري (ملك الكواكب)

قبل ما نجاوب علي السؤال ده تعالي نتكلم شويه مع بعض و نقول شوية معلومات عن كوكب المشتري.

اول حاجه هي اصل التسمية العربيه هو من الفعل يستشري بمعني يتهادى في المسير، و ده يشير لعدم حدوث أي تغير في مداره.

المشتري هو الكوكب الخامس من حيث ترتيبه في كواكب المجموعه الشمسيه و هو من العمالقه الغازيه و اكبر كواكب المجموعه الشمسيه (ملك الكواكب)  و السبب في كونه كوكب غازي هو دورانه السريع، اللي بيخليه مش بيقدر يكون سطح صلب ليه. 

و لما نقول ان الكوكب ده دورانه سريع فهو فعلا سريع، لدرجة انه من اسرع الكواكب في الدوران حول نفسه بحيث انه بيلف مره واحده حول نفسه كل 10 ساعات.

و ده اللي بيودينا لنقطة ان اليوم علي كوكب المشتري هو اقصر من اليوم علي باقي كواكب المجموعه الشمسيه.

كمان المشتري بياخد بالتقريب كده 12 سنه ارضيه عشان يتم دوره كامله حوالين الشمس، و السرعه اللي بيتحرك بيها هي47,051 كم/ساعه في مداره حوالين الشمس.
و كمان هو ثالث المع الاجرام في سماء الليل بعد القمر و كوكب الزهره و ده اللي بيخليه سهل الرصد لينا من الارض.

لو جينا بقي نقارن حجم المشتري بالأرض هنلاقي ان لو تخيلنا ان المشتري ده عباره عن كوره فاضيه نقدر اننا نحط جواها 1,321 كوكب زي الارض و ده يدل علي حجمه الهايل، بحيث يكون وزنه اكبر بمرتين و نص من وزن الكواكب الثمانيه الباقيه كلها.

البقعه الحمراء العظيمه 

و تعتبر من اشهر الحاجات اللي بتميز كوكب المشتري هي ال Greet Red Spot ودى عاصفة ضخمة شبه الاعصار وبتساوى 3 اضعاف قطر الأرض تقريبا وبتدور حوافها عكس اتجاه عقارب الساعة حول مركزها بسرعة حوالي 225 ميلاً في الساعة (360 كم / ساعة).

الاقمار:

من الحاجات الملفته جدااا في المشتري هي الاقمار، فكوكب المشتري عنده 79 قمر، اشهرهم و اكبرهم هما الاربع اقمار الجاليليه، و هما ايو و يوروبا و كاليستو و غانيميد (Io, Europa, Callisto and Ganymede)
و الاربع اقمار دول اتسموا بالتوابع الجاليليه نسبة الي مكتشفهم العالم جاليليو جاليلي اللي قدر يشوف الاقمار دي لأول مره عن طريق تلسكوبه سنة 1610.

غانيميد:

يعتبر غانيميد (Ganymede) من أكبر الاقمار في النظام الشمسي و هو اكبر من كوكب عطارد و بيمتلك جبالا و وديان و تدفقات لحمم بركانيه. 

ايو:

و بيمتلك ايو(IO) الكثير من البراكين النشطه ده غير سطحه المغطى بالكبريت و هو من اكثر الأجسام اللي عندها نشاط بركاني في نظامنا الشمسي، و يعتبر حجم ايو(IO) قريب لحجم قمرنا

يوروبا:

هو رابع اكبر اقمار المشتري، العلماء بيعتقدوا بوجود حياه عليه و ده بسبب وجود دلائل علي امكانيه وجرد ماء سائل تحت سطحه الجليدي.
مافيش شك أن المياه من متطلبات الحياه الاساسيه و وجود الماء علي يوروبا ده بيدي احتمال لوجود حياه حتي لو كانت حياه بكتيريه بدائيه.

التركيب الكيميائي:

زي ما قولنا كوكب المشتري مش بيمتلك سطح صخري، فهو بيتكون من طبقات غازية بتزداد كثافتها كل ما زاد العمق نحو مركزه، بحيث بيتكون من 90% من الهيدروجين، و10% من الهيليوم، مع كمية قليله من الأمونيا و الماء، وغيرها من الغازات اللي بتضفي اللون عليه.

تكوينة العناصر دي مع بعض هي السبب في الوان المشتري المختلفه اللي بنشوفها من اللون الأبيض و البرتقالي و البني و الأحمر.

طب احنا اتكلمنا قبل كده و قولنا ان اساس اي نجم هو عنصر الهيدروجين و الهيليوم لانهم زي ما قولنا هما البنزين بتاع النجوم و هنا بقي نيجي للسؤال المهم
⬇️⬇️⬇️⬇️ 

ليه كوكب المشتري مش نجم؟؟؟

بيطلق العلماء علي كوكب المشتري اسم النجم الفاشل، لأنه بالمقارنه مع الشمس يعتبر خفيف الوزن، و بيحتوي علي 0,1% من كتلة الشمس، بس ماعندوش الكثافه الكافيه لإنتاج درجات حراره داخليه و ضغط كافيين للبدء بالانصهارات و التفاعلات النوويه اللي اتكلمنا عنها قبل كده و اللي تخليه يتحول لنجم و كمان كمية الاكسيجين و الماء الموجودين مش كفايه لدعم عملية الاحتراق.

أقرأ ايضا: علم الفلك الجزء الاول

بس خليني اقولك ان لو كان المشتري نجم ده اكيد كان ممكن يأثر علي نظامنا الشمسي بالسلب و الله اعلم كان هيكون ايه مصير كوكب الارض في الحاله دي، و الحاله دي اللي هي وجود نجميين في نظام واحد اسمها نجم ثنائي.

ممكن نقول اه المشتري نجم فاشل بس ده ما يمنعش ان الكوكب ده حمي كوكب الأرض و الكواكب الداخليه من مذنبات و نيازك كانت ممكن تدمر الحياه علي الأرض، الكلام ده كله هنشرحه قريب ان شاء الله بالتفاصيل.

 خليني اقولك علي حاجه بقي و هي انك ممكن تشوف كوكب المشتري بعنيك من الساعه 1 بعد نص الليل لحد قبل الفجر دي احسن فتره تقدر تشوفه فيها و هتشوفه كنجمه بتشرق من الجنوب الشرقي و تقدر تستخدم تطبيق Sky Safari و تحمله من ال Play Store عشان يسهل عليك عملية رصده في سماء الليل.