علم الفلك الجزء الثالث | موت النجوم (نهايه دراميه)

علم الفلك الجزء الثالث | موت النجوم (نهايه دراميه)

-ايه ده انت نمت طب و ده ينفع بذمتك مش المفروض نقعد نتكلم مع بعض زي امبارح و نكمل موضعنا

= يا عم ابوس ايدك سيبني انام

- لا لا مافيش الكلام ده يله نكمل

= طب يله ماشي 😭😭😭

- احنا وقفنا امبارح...😴😴

= .........

- لا اصحي بدل ما افكرك بكل خوازيقك حالا انت عارفني مجنون

= لا خلاص انا صحيت اهو خلاص احنا وقفنا المره اللي فاتت عند ايه هي انواع موت النجم و طرقه

- ايوه كده اصحي معايا نكمل بقي...


خليني اقولك علي حاجه الأول كده و هي ميلاد النجم أصلا و هي ان النجوم شبه طائر الفينيق (Phoenix) و هو الطائر الأسطوري اللي بيتحرق في نهاية حياته و من رماده بيتولد، النجوم بالظبط كده في نهاية حياتها بتنفجر في هيئة سدم (Nebula) و منها بتتولد نجوم جديده.

في المره اللي فاتت اتكلمت معاك علي التسلسل بتاع الاندماج النووي و ايه هو وقود النجوم (اللي هو الهيدروجين) و امتي بيتحول الوقود ده من عنصر للتاني او بمعني ان الهيدروجين بيحصله اندماج فبيبقي هيليوم و لما الهيدرجين بيخلص بيتبقي الهيليوم في بيحصله اندماج و يتحول لأوكسيجين ....وهكذا، النجوم اللي بتوصل لمرحله دمج و تحويل الهيدروجين من عنصر للتاني دي احنا بنسميها نجوم التسلسل الرئيسي.

أقرا ايضا: علم الفلك الجزء الثاني | موت النجوم

بس خلينا اقولك ان في البدايه خالص، ساعة ما كان النجم بيتولد بيكون قدامه احتمالات كتير عشان يكون اللي هنقدر نشوفه فيه، ازاي بقي دي مهمتي اللي انا هقولك عليها.
زي الاقزام البنيه و دي نجوم فشلت انها تكون اندماج نووي في قلبها ده غير ان كتلتها ضعيفه جدا (50-70 مرة قد كوكب المشتري) و مصدر حرارتها الوحيد هو قوي الاحتكاك بين مكونتها.

نيجي بقي لنجوم التسلسل الرئيسي عندنا النجوم اللي كتلتها قد كتلة الشمس لحد 8 كتل شمسيه في نهاية حياتها بيحصل ان النجوم دي بتتضخم عشان تبقي عملاق احمر(Red Giant) و اللي في نهاية حياته بيقذف طبقاته الخارجيه في شكل رياح نجمية قويه جدااا و بيكون سحابه ملونه جميله بنسميها سديم كوكبي (Planetary Nebula) و مافيش بين السديم الكوكبي ده و الكواكب أي علاقه غير اننا لما بنشوفه من خلال التلسكوبات الصغيره بيكون شكله شبه الكوكب، و بيكون في قلب السديم ده بقايا النجم الميت متركزه في نواته و بيبقي قزم ابيض (White Dwarf). 

عندك الصوره اللي انت شايفها دي، التقطها تلسكوب هابل لسديم كوكبي اسمه سديم الحلقه (Ring Nebula) و هو واحد من السدم الكوكبيه الكتير الموجوده في الكون اللي قدرنا نرصدها، في الصوره تقدر تشوف ان في وسط السديم نقطه بيضه بتلمع هو ده القزم الابيض الناتج عن انفجار العملاق الاحمر في منظر اقل ما يقال عنه انه بديع جداااا.

اما بقي النجوم الأكبر من 8 كتل شمسيه بتتحول في نهاية حياتها لعملاق احمر عظيم (Red Super Giant) و اللي بسبب قوي الجاذبيه الكبيره اللي بتبقي عليه بينفجر في صورة مستعر اعظم (Supernova) و بيتبقي في مركزه اما نجم نيوتروني (Neutron Star) او ثقب اسود (Black Hole).

العامل اللي بيفصل بين تكون نجم نيتروني او ثقب اسود بعد الانفجار ده هو كتلة النجم اللي بينهار، بمعني ان لو الكتله كبيره جدااا فالنجم مش هيتوقف عن الانهيار لحد ما يوصل لمرحلة الثقب الأسود اما لو كتلته كانت اقل فانهياره هيقف عند مرحلة النجم النيوتروني.

عندك بقي نجوم غريبه جدااا يا اخي و هي العمالقة الزرقاء (Blue Giants) و دي نجوم بتبدأ حياتها و كتلتها كبيره جدااا ممكن توصل كتلتها من 20:100 كتله شمسيه و بتنفجر بعد عمر يعتبر الي حدما قصير (يعني بعد ملايين من السنيين مش حوار يعني😂😂😂) في حالته الغريبه دي في نهاية حياتها بتنفجر في صورة مستعر اعظم و بيتبقي في مركزه ثقب اسود.

- ايه ده انت نمت😒😒

= ايه......لا يا عم انا لسه مغمض عيني اهو كنت مركز معاك والله

- مركز اه اه ما هو واضح روح نام روح

= ايه ده والنبي

- اه روح ما اصل الاهتمام مابيطلبش

= حبيبي تسلم الله يخليك


يتبع....
All Image credit for: ESA/Hubble & NASA