زومبي حول الأرض

زومبي حول الأرض

طبعا هتسالني تقولي ايه العنوان الغريب ده ايه اللي جاب الزومبي في الفضاء، اقولك ان الزومبي ده مش زي ما انت فاكر زي أفلام الخيال العلمي و هو انسان مات بس لسبب ما بقي بيتحرك و يعدي اللي حوليه بس طبعا مافيش الكلام و ده كله بيبقي في الأفلام و بس.

تيجي و تقولي اومال تقصد ايه، اقولك انا بقي

في يوم 25 مارس اللي فات شاب اسمه سكوت تايلي و هو مشغل راديو هاو عايش في كندا نشر تويته علي تويتر و هي انه اكتشف قمر صناعي امريكي قديم اسمه "Satellite LES-5" و أتأكد من موقعه حول الارض خلال شهر ابريل اللي فات.و القمر الصناعي الامريكي ده تم اطلاقه سنة 1967 لأغراض عسكريه، بس لأسباب تقنيه ما اتعطل القمر و قعد يدور حول الأرض رغم تعطله.

و القمر الصناعي في العموم هو جهاز من صنع الانسان بيدور في مسار محدد في الفضاء الخارجي حوالين الأرض او أي كوكب اخر و بيبقي ليه أدوار مختلفه زي الاتصالات او الفحص او الاستكشاف.
و طبعا الأقمار دي ليها فوايد كتيره و بنستخدمها في مجالات مختلفه زي الاتصالات و تحديد الأماكن و التنبؤات الجويه ده غير استخدمها في مجال البحث العلمي زي دراسة الفضاء و مراقبة الأرض ده غير ان ممكن استخدامها في أغراض الامن و لأغراض عسكريه زي حالة قمرنا الصناعي العسكري "Satellite LES-5".

كمان تايلي وضح ان القمر الصناعي "الزومبي" بسبب انه بيدور حول الأرض من غير ما يشتغل بمعني من غير ما يرسل او يستقبل أي إشارات، تم اكتشافه في مدار حول الأرض اسمه GEO و هو اختصار لمصطلح "المدار الاستوائي المتزامن مع الأرض" و هو المدار اللي بتدور فيه الأقمار الصناعيه في نفس اتجاه كوكب الأرض (من الغرب الي الشرق) بحيث ان المده اللي بيستغرقها القمر عشان يتم دوره كامله حول الأرض هي نفس المده اللي بتستغرقها الأرض عشان تتم دوره حول نفسها و هي بالتقريب كده 24 ساعه.

خليني اقولك ان مش ده القمر الوحيد اللي موجود في المدار ده بالعكس، المدار ده بنسميه مقبرة الأقمار الصناعيه الميته بحيث تسبح معظم الأقمار الصناعية المعطله في المدار ده اللي بيبعد حوالي 22,400 ألف ميل عن سطح الأرض، واللي بيبعد كمان 200 ميل عن أبعد قمر صناعي حي أو قمر صناعي شغال بمعني اصح.
ده كمان مكتب الأمم المتحدة للفضاء الخارجي، قال في بداية سنة 2019، ان موجود حوالي 5 الاف قمر صناعي بيدورو حوالين الأرض.