أكيد في مره من المرات الكتير اللي قبل ما تنام فيهم و جالك Over Thinking سالت نفسك السؤال ده و هو "ايه اللي يحصل للشمس بعد ما تموت ؟؟؟"🤔🤔
احب احيك الصراحه علي السؤال العبقري ده لأنه فعلا سؤال مهم و العلماء جابوه عليه ... تعالي بقي استغلك صح و اقولك ازاي نجم يموت اصلا مش شرط الشمس يعني
بص يا سيدي النجم بيموت في حالة ان الوقود بتاعه اللي هو عباره عن هيدروجين بيخلص ... هتروح انت قايلي يعني ايه الوقود بتاعه يخلص اروح انا بردوا محيك علي سؤالك و اقولك اهدي شويه كده و انا هفهمك.
أقرأ ايضا: علم الفلك الجزء الاول
بص يا سيدي جوه اي نجم بيحصل تفاعلات اندماج نووي (اللي هو اساس صناعة القنبله الهيدروجينيه) كل اللي بيحصل ان بسبب التفاعلات دي بيحصل انتاج كبير للطاقه من قلب النجم الطاقه بتشكل ضغط لخارج النجم بيعادله (او بيساويه يعني) الضغط اللي بتشكله الجاذبيه علي النجم ده و بالتالي بيحصل توازن و بيستقر النجم ده و يبقي زي الشمس بتاعتنا كده.
معني ان الوقود يخلص يعني ان الاندماج النووي بيخلص يعني خلاص مبقاش فيه هيدروجين في النجم ده و كل اللي موجود في النجم هي ذرات هيليوم كنتيجه للاندماج اللي حصل مابين ذرات الهيدروجين مع بعض و ساعتها الضغط الناتج من الجاذبيه علي النجم هيكون اكبر من الضغط الناتج من الادماج فهينهار النجم علي نفسه.
بس استني تعالي هنا اقولك علي حاجه في نجوم بتكمل و بتعمل اندماج نووي بذرات الهيليوم دي و ده بيتوقف علي حجم النجم ده يعني كمثال الشمس بتاعتنا لما يبتدي الهيدروجين الموجود فيها انوا يخلص هيحصل انها هتنكمش حاجات بسيطه و تبتدي درجة حرارتها تعلي عشان تقدر تعمل اندماج نووي للهيليوم و يتكون الكربون و لما الهيليوم يبتدي يخلص هيحصل انها تنكمش و يحصل اندماج للكربون و تكون اكسجين و بعده سيليكون و بعده حديد و لما توصل للحديد النجم ساعتها ميقدرش يعمل اي اندماج بسبب ان الحديد من اكتر العناصر استقرارا في الطبيعه و مش هيقدر النجم ينتج طاقه و يموت او زي ماقولنا ينهار علي نفسه بسبب الجاذبيه ، بس حتي الموت ده ليه انواع و طرق ...
يتبع..........
تعليقات
إرسال تعليق