هاري بوتر و النجوم

- ايه يا عم العنوان الغريب اللي انت كاتبه ده، مال هاري بوتر و مال النجوم 🤔🤔🤔

= تعالي يا عم احكيلك، انا لسه متفرج على فيلم Harry potter and the order of phoenix و طبعا اتاثرت جدا لما Sirius Black مات و هو كان كل ما تبقي من اسرة هاري و هو الاب الروحي ليه بس تعالي اكلمك على شوية حاجات عن Sirius Black و سبب تسميته من مؤلفة السلسه J.K.Rowling

طبعا اللي متابع سلسلة هاري بوتر سواء انت قاريتها او اتفرجت على الأفلام فأحب احيك بجد لان انت عظيم و تابعت سلسله عظيمه انما لو لسه ماقرتش السلسله او اتفرجت على الأفلام فانا برشحهالك و بقوه و كمان، المهم لو انت بقي متابع جيد فشخصية Sirius Black المعروف عنه، ان هو الاب الروحي لهاري و كمان عنده القدره لأنه يتحول لكلب لونه اسود تحت لقب بادفوت.

- يا عم انت عمال تتكلم عن أفلام و كده ما تدخل في الموضوع 🙄🙄🙄

= حاضر يا عم ماشي هدخل في الموضوع اهو، بص يا سيدي لو انت متابع جيد لسماء الليل ف في نجمه بتبقي مضيئه و ظاهره للعين تحت كوكبة الجبار زي الصوره اللي حاططها انا كده شوف بقي يا اخي الصدفه ان النجمه دي اسمها Sirius (او الشعري اليمانيه) برضوا.

- ايه ده يا راجل صح انا دايما بشوفها ايه الصدفه الغريبه دي.

= استني بس يا عم خود، الموضوع لا صدفه ولا حاجه انت صدقت ولا ايه 😅😂

- .....😒😠😡

= هفهمك هفهمك، بص يا سيدي النجمه Sirius او زي ما العرب بيسموها "الشعري اليمانيه" هو نجم من مجموعة نجوم كوكبة الكلب الأكبر الموجوده وراء كوكبة الجبار و في اساطير الاغريق عند موت الصياد اوريون، زيوس كبير الألهه رفع جثمان اوريون في السماء و هو كوكبة الجبار و معاه كلاب الصيد بتوعه و هما كوكبة الكلب الأكبر و كوكبة الكلب الأصغر. 

أقرأ ايضا: اسطورة كوكبة الجبار

المثير بقي هو ان الشعري اليمانيه هو نجم ثنائي بمعني انه بيتكون من نجمين بيدورو حوالين مركز جاذبيتهم، النجم الأول هو الشعري اليمانيه أ (Sirius A) و ده كتلته ضعف الشمس تقريبا و هو المع نجوم الكوكبه، اما النجم التاني و هو الشعري اليمانيه ب (Sirius B) هو نجم خافت بنقدر نشوفه بالتلسكوب و تم اكتشافه سنة 1862م.

الشعري اليمانيه (Sirius) سبب سطوعه الواضح لينا و سهولة رصده هو قربه من نظامنا الشمسي فهو بيبعد 8.6 سنة ضوئيه عننا و بالمسافه دي فهو يعتبر من أقرب النجوم للأرض.

Sirius زي ما قولنا بينتمي لكوكبة الكلب الأكبر و منها جت تسمية شخصية Sirius Black علي اسم المع نجم في كوكبة الكلب الأكبر، ده بالإضافة لان الشخصيه كانت عندها القدره علي التحول لكلب.

من الحاجات الحلوه اللي في سلسلة هاري بوتر هي ان في شخصيات كتير متسميه علي أسماء نجوم و مجرات و ده اللي يخلينا نهتم بالتفاصيل الصغيره لان حتى التفاصيل دي بيبقي فيها حاجات تدهشنا زي ما دايما السماء بتدهشنا لما بنبص ليها في الليل.