الكتابة في الفضاء

 

 

 

لو انت متابع للأفلام الهندي كويس اكيد هتكون سمعت عن فيلم (3Idiots) للرائع عامر خان، وببساطه احداث الفيلم بتدور حول ثلاثة طلبة جامعيين التحقوا للدراسة بالكلية الهندسية الملكية بنيو دلهي، واللي تعتبر من أفضل جامعات الهندسة في الهند، وهم رانشو (عامر خان)، وراجو (شرمان جوشي)، وفرحان (مادهافان)، أحداث الفيلم بتكمل في إطار كوميدي بينتقد أساليب التعليم والضغوطات اللي بيتعرض ليها الطالب في الهند باتباع طرق تعليمية تقليدية.

احنا بقي كل اللي يهمنا من الفيلم في موضوع النهارده هو مشهد حصل بين بطل الفيلم رانشو و عميد الكلية فيرو، كان بيتكلم مع طلبة الكلية و بيوريهم قلم بيستخدم تحت أي ظرف و القلم ده بيستخدموا رواد الفضاء في رحلاتهم لان الأقلام الحبر مش هيقدروا يكتبوا بيها بسبب انعدام الجاذبية و ان قد ايه العلماء صرفوا مليارات الدولارات في الأبحاث عشان يعملوا القلم ده، فرانشو سئله ليه رواد الفضاء مايستخدموش قلم رصاص و كانوا يوفروا المليارات دي و ساعتها مدير الكلية ماقدرش يجاوب على السؤال.

و بيكمل الفيلم في إطار كوميدي عن معاناة الطلاب و الدراسة و انتقاد التعليم بشكل مضحك لحد ما بتحصل مشكله و رانشو بينطرد من الكلية و بعدها بيساعد المدير في حل مشكلة ما و ساعتها المدير بيقوله انه مش لازم يكون دايما صح و ان قد ايه اختراع القلم ده مهم و ان لو رواد الفضاء استخدموا قلم رصاص، ممكن سن القلم الرصاص ده يتكسر و ساعتها الرصاص ممكن يتعلق في الأجهزة الالكترونية او يدور بسرعه كبيره بسبب انعدام الجاذبية و يدخل في عين او انف رواد الفضاء.

وهنا بقي نتكلم عن الموضوع بتاعنا و هو قلم الفضاء.

ناسا صرفت الملايين من الدولارات لتطوير قلم حبر عشان يستخدم للكتابة في الفضاء، في وقت ما كان رواد فضاء الاتحاد السوفييتي بيستخدموا القلم الرصاص، ومما لا شك فيه أن انعدام الوزن في الفضاء يسبب مشكلة كبيرة في الكتابة بالقلم الحبر، ولم يتمكن التخطيط المركزي السوفييتي و وكالة الفضاء السوفيتية ساعتها تحل المشكلة دي ولا الأمريكيون اللي عندهم الخبرة العالية، لكن اللي حلها مستثمر يمتلك فكرة جيدة.

وبشكل عام ماكنتش الأقلام الرصاص هي الخيار الأفضل، و ده بسبب تحطم أسنانها و سرعة اشتعالها أيضا، و بكده هي بتسبب خطر على رواد الفضاء، و ناسا ماكنتش عايزه تكرر حريق أبولو1.

مستثمر بطموحات عالية:

المستثمر اللي قدر يحل المشكلة دي هو بول سي فيشر، اللي قدرت شركته تستثمر اكتر من مليون دولار لصنع قلم حبر يستطيع الرواد الكتابة بيه في الفضاء، وماكنتش الاستثمارات دي مموله من ناسا، لكن ناسا بقت مرتبطة بالاختراع بعد تحقق حلم صنع القلم وظهوره على أرض الواقع، وفي عام 1965 حصل فيشر وشركته على براءة اختراع هذا القلم الذي يكتب رأسا على عقب ويستطيع الكتابة في درجة حرارة عالية جدا توصل ل 200 درجه سليزيوس أو درجة حرارة باردة جدًّا تصل ل -45 سليزيوس والكتابة في الماء والسوائل الأخرى، وبيتحول لون الحبر في درجة الحرارة العالية إلى اللون الأخضر بدل من الأزرق المعتاد.

يختلف حبر القلم ده عن أي حبر عادي، فيشر استخدم حبر يفضل في حالة صلبة مادام ماحدش استخدمه، ويرجع إلى الحالة السائلة أثناء استخدامه، وقام باستخدام النيتروجين المضغوط عشان يمنع الحبر من الاختلاط مع الهواء فلا يتبخر ولا يتأكسد.

في نفس السنة قدم فيشر نموذج قلم الفضاء (AG-7) "مضاد الجاذبية" لناسا، بس في البداية كانت ناسا مترددة بس بعد اختبارات كتير علي القلم و جودته، قررت ناسا استخدامه في رحلاتها بداية من سنة 1967.

ووفقا لشركة فيشر فقلم الفضاء ما كنش استخدامه الوحيد لتسهيل الكتابة في انعدام الجاذبية فقط، لكن كمان استخدمه رواد الفضاء في رحلة أبولو 11، لإصلاح واحد من المفاتيح المعطلة، وكان سببا لعودتهم إلى الأرض.

ومن أواخر الستينيات بقي رواد الفضاء الأمريكيون والروس بيستخدموا أقلام فيشر، وقدر فيشر انه يعمل خط تصنيع كامل لأقلام الفضاء، طبعا بعد كل الكلام ده عن القلم و مميزاته الكتيره دي لو حبيت تشتريه فانت تقدر تطلبه من على امازون بسعر 60 دولار هو اه احنا فمصر بس ده لو حبيت بقي.