ليه السماء لونها أزرق

 

ليه السماء لونها ازرق؟

السؤال ده يعتبر من الأسئلة الوجودية زي سؤال كيف بدأ الخلق كده و اللي بيجي في بالنا في لحظة فراغ و تامل مننا، فتعالي كده نعرف ايه إجابة السؤال ده مع بعض.
عشان نعرف إجابة السؤال ده تعالي اشرحلك شوية حاجات كده في الأول.

أولا: خليني اقولك ان الضوء هو عبارة عن موجات كهرومغناطيسية و بيتكون من أطياف ضوئية عددها سبعه و هما بالترتيب من الأكبر في الطول الموجي للأصغر في الطول الموجي: الأحمر والبرتقالي والأصفر والأخضر والأزرق والبنفسجي والنيلي.
و الاطياف الضوئية دي نقدر نشوفها بكل سهوله لما نمرر ضوء على منشور زجاجي و ساعتها الضوء بيتحلل للأطياف السبعة اللي قولنا عليها او نقدر نشوفه في صورة قوس قزح اللي بيبان بعد يوم ممطر في السماء.

ثانيا: طبعا انا لو جيت سالتك دلوقتي ايه هو لون الشمس هتجاوب بكل تلقائيه ان لون الشمس اصفر، بس للأسف انت غلطان لون الشمس الحقيقي مش اصفر انما لونها الحقيقي هو ابيض و ده موضوع ممكن نناقشه بعدين حاضر تعالي نركز في لون السماء دلوقتي.

ثالثا: من خواص الضوء انه يقدر ينكسر (زي ما قولنا فوق) و يتداخل بس اللي يهمني من خواصه هو خاصية الانعكاس، و دي نقدر نقول ان لما ضوء الشمس بيوصل لاي جسم فالجسم ده بيمتص ألوان (او اطوال موجيه معينه) و بيعكس الألوان التانيه.

اتلغبطت طب استني هفهمك دلوقتي لو ضوء الشمس وصل لقميص لونه احمر اللي هيحصل ان صبغة اللون الأحمر اللي موجودة في القميص هتمتص كل الاطوال الموجية (الألوان) من الضوء و هينعكس لعنينا اللون الأحمر بس، و الاجسام اللي لونها ابيض بنشوفها كده لأنها بتعكس كل الاطوال الموجية و مش بتمتص أي حاجه.

تعالي بقي نطبق الكلام ده في السماء

لما ضوء الشمس بيوصل للغلاف الجوي لكوكبنا فهو هيصطدم بمكونات الغلاف الجوي و اللي هي عباره عن مجموعه من الغازات و جزيئيات الهواء، فجزء من الضوء هيتشتت و الجزء التاني هيمتص من الغازات و الجزيئات دي و ده بنعرفه بتبعثر ريليه او التشتت المرن للضوء و التشتت ده بيحصل نتيجة تأثير جسيمات دقيقه في الغلاف الجوي على الضوء.

و بنلاقى لما ضوء الشمس بيوصل للغلاف الجوي و بيحصل تشتت للأطوال الموجية بتاعت ضوء الشمس و هنلاقي ان نسبة تشتت الضوء الأزرق و البنفسجي أكبر من تشتت الضوء الاحمر و الأصفر و ده لان اطوالهم الموجيه أقصر، و في الحقيقة فالضوء البنفسجي بيتشتت اكتر من الضوء الأحمر بحوالي 9 مرات.
طب دلوقتي هيجي في بالك سؤال و هو ليه مش بنشوف السماء لونها بنفسجي مش ازرق، اقولك ان ده يرجع لطبيعية عين الانسان انها اكتر حساسية للضوء الأزرق منها للضوء البنفسجي و كمان لان جزء من الضوء البنفسجي بيمتص في الغلاف الجوي العلوي.

طب في اوقات السماء بيكون لونها رمادي، وده بيبقي بسبب وجود قطرات من الماء على شكل سحب، أو رطوبة في الغلاف الجوي، فقطرات الماء بتعمل على عكس جميع ألوان الطيف، و ده بيخلينا نشوف ضوء أبيض باهت، الموضوع شبه أنك عديت الضوء الأبيض من خلال ورقة بيضاء.
أنما عند شروق الشمس وغروبها، فلون السماء بيميل إلى الحمرة، وده لأن الشمس في فترة الشروق والغروب بتكون أبعد ظاهريا عن الأرض، عشان كده الضوء الأحمر اللي عنده طول الموجي كبير زي ما قولنا قبل كده هو الضوء اللي هيتشتت أولا ويقدر انه يختراق الطبقات المنخفضة في الغلاف الجوي، و من العوامل اللي بتساهم في حدوث تشتيت إضافي للضوء الأحمر كلا من الغبار و الأدخنة و التلوث اللي بيبقي في الغلاف الجوي، عشان ده بنشوف السماء اكتر حمرة عند الغروب و ده بيبقي بسبب تراكم الدخان و الغبار خلال ساعات النهار المتأخرة مقارنة بساعات الليل المتأخرة و الفجر.

أما بالنسبة للكواكب التانيه في مجموعتنا الشمسية، اللي مش بتتمتع بغلاف جوي زي كوكبنا، فالسماء عليها هتبقي مختلفة، يعني مثلا المريخ اللي الغلاف الجوي بتاعه بيمثل حوالي 1% من سمك الغلاف الجوي للأرض، ونتيجة لده ضوء الشمس مش هينتشر بالشكل اللي بيحصل على كوكبنا، ده كمان العلماء بيتوقعوا أن يكون للمريخ سماء زرقاء باهتة اللون، بس بسبب ضباب البخار المعلق في الهواء، بتظهر السماء في النهار على سطح المريخ، أكثر اصفرارا و ده لأن جزيئات الغبار الأكبر بتمتص الضوء الأزرق اللي صاحب الطول الموجي القصير، وبتنتشر الألوان المتبقية لإعطاء تدرج للون الأحمر فوق سماء المريخ.