ما هو المع جرم سماوي بعد الشمس و القمر

 

ما هو المع جرم سماوي بعد الشمس و القمر؟

طبعا انت قولت ان المع جرم سماوي بعد الشمس و القمر هو المشتري بسبب انه أكبر كواكب المجموعة الشمسية فبالتالي انت استنتجت انه هيبقي ده المنطقي بس للأسف استنتاجك غلط لان المع جرم سماوي نقدر نشوفه بعد الشمس و القمر هو كوكب الزهرة.

كوكب الزهرة مش بيلمع بالشكل ده عشان حجمه بالعكس حجم كوكب الزهرة مقارب لحجم كوكبنا الأزرق ، لكنه بيلمع بسبب غلافه الجوي الكثيف جدا لدرجة انه بيعكس الضوء زي المرآه.

طب خلينا نفهم كده مع بعض الغلاف الجوي للزهرة بيتكون من ايه.

تكوين الغلاف الجوي لكوكب الزهرة:

الزهرة بيمتلك غلاف جوي كثيف جدااا و اللي بيتكون بشكل أساسي من غاز ثاني أكسيد الكربون و نسبه صغيره من النيتروجين و سحب من حمض الكبريت، و كتلة الغلاف ده مقارنة بغلاف كوكبنا الأزرق هو 93 مره من غلاف كوكبنا و الضغط الجوي للزهرة بيساوي 92 مره من الضغط الجوي لكوكبنا و أقرب مثال للضغط ده هو اكنك بتغطس في عمق 1000 متر تحت سطح البحر و طبعا دي حاجه مستحيل أي انسان يقدر يستحملها و ان ابعد نقطه قدر يوصلها انسان تحت سطح البحر كان الغواص هربرت نيتش و اللي قدر يوصل لعمق 253 متر تحت سطح البحر.

طب ده الغلاف الجوي طب و سطح الكوكب بقي عامل ازاي، يعتبر سطح الزهره من اكثر الكواكب في المجموعه الشمسيه كلها اللي بتنتشر عليه البراكين و كمان بيعتقد العلماء ان الزهره لسه نشط جيولوجيا و بركانيا.

كل العوامل دي خلت الكوكب يحصله احتباس حراري قوي علي سطحه لدرجة ان درجة الحراره علي سطحه بتوصل ل 460 درجه مئويه اعلي من درجة الحراره علي سطح كوكب عطارد اللي بتوصل ل 420 درجه مئويه بسبب كل ده فاحنا مش هنكدب لما نشبه ان سطح الزهره يعتبر زي الجحيم.

و كل العوامل دي بتودينا لنتيجه واحده الا و هي الموت المباشر لو فكرنا نزور الكوكب ده، بس في سؤال ظريف ممكن نساله هو انت هتموت بانهي طريقه الأول ، بالغاز الكبريتي السام ولا الحراره العاليه؟

عشان كده احنا هنكتفي باننا نراقبه في سماء الليل وقت ظهوره لامعا في السماء.

امكانية الحياة علي كوكب الزهرة:

من اهم العوامل اللي نقدر نقول بيها ان الكوكب ده صالح للحياه او لا هي توافر الماء و الاكسجين دول اهم عاملين و مع ان العوامل دي مش متوفره علي كوكب زي الزهره بسبب ظروفه البيئيه القاسيه الا ان العلماء بيعتقدوا في وجود حياه عليه و ده بسبب اكتشافهم لغاز الفوسفين في الغلاف الجوي و الغاز ده بيكون ناتج عن الكائنات الحيه.

بس العلماء بياكدوا علي ان اكتشاف غاز الفوسفين مش ضروري يثبت وجدود حياه علي كوكب الزهره و حتي ان وجدت الحياه دي فهتكون في صوره حياة ميكروبيه بس ده طبعا هيكون محتاج لمزيد من الدراسه للكوكب.

بس خليني برضوا اقولك مش كوكب الزهره بس هو اللي بنشك في وجود حياه عليه، في أماكن كتير في المجموعه الشمسيه العلماء بيعتقدوا انها ممكن تكون حامله للحياه عليها زي قمر المشتري يوروبا و قمري زحل انسيلادوس و تيتان لكن لحد دلوقتي مانقدرش ناكد وجود حياه في المجموعه الشمسيه او خارجها غير علي كوكبنا الأزرق.

بس في رأيك هل تفتكر في حياه اخري غير اللي علي الأرض في الكون الواسع ده؟