عيد الحب و نجوم السماء

 

يظهر في الصوره شكل كوكبة الثور كما تري في السماء و نجم الدبران (Aldebaran) و العنقود النجمي الثريا (Pleiades) و نري الاثنين كان احدهم يتتبع الاخر. 

النهارده و بمناسبة عيد الحب خليني اكلمك عن اسطوره عربيه لجرمين سماوين مميزين هما جرمي الثريا و الدبران.

بس تعالي نتعرف الأول كده علي الجرمين دول.

نجم الدبران (Aldebaran) هو النجوم اللي اسمها بالعربي هو هو نفس الاسم باللغه الانجليزيه و هو نجم ضمن كوكبة الثور و يعتبر من المع نجوم الكوكبه، و هو من نوع العمالقه الحمراء و المرحله دي من عمر النجم بيتميز فيها النجم ان معظم تكوينه من هيدروجين بسبب تفاعلات الاندماج النووي اتحولت لهيليوم، و بدا الهيليوم ده في التحول الي كربون.

اما الثريا (Pleiades) فهي *عنقود نجمي مفتوح موجود في كوكبة الثور و هو يعتبر من المع و اشهر العناقيد النجميه في سماء الليل، و بيحتوي عنقود الثريا علي اكثر من 500 نجم و كل نجم بيبعد عن التاني اكتر من بعد الأرض عن الشمس و دي مسافه تعتبر كبيره، و بتنتشر علي مساحة 50 سنه ضوئيه و بتبعد عن الأرض بمسافة 440 سنه ضوئيه، و كتير من متابعين سماء الليل بيقدروا يميزوها بالعين و لو بيتم رصدها فمكان مظلم كفايه بتقدر تميز لحد 8 نجوم من العنقود.

أقرأ ايضا: اسطورة كوكبة الجبار

اسطورة الثريا و الدبران عند العرب:

العرب زمان كانوا دايما بيتفائلوا و يتبركوا بالثريا عند ظهورها في سماء الليل و كانوا بيقولوا ان المطر اللي بيحصل في اثناء وجود الثريا سواء في وقت شروقها او غروبها فهو بيجلب الثروه.

و كانت بتبقي موجوده في المنزل التالت من *منازل القمر، و كانوا بيقدروا يميزوا نجومها بالعين المجرده و كانوا بيشبهوها بعنقود العنب عشان يقربوا الشكل، و نتيجه انها لامعه جدااا فسموها نجم الثريا، و نجم الدبران اتسمي بالاسم ده لأنه "يدبر الثريا" يعني بيتبع الثريا في وقت وجودها في سماء الليل يعني هو بيشرق و يغرب بعد الثريا.

و الفتره اللي بين ظهور النجمين كان العرب بيسموها بالضيقه و ده لانهم كانوا بيتشائموا من ظهور الدبران و يقولوا ان لو امطرت في وقت شروقه او غروبه فالسنه دي هينقطع فيها المطر عن الأرض.


و بحسب الاسطوره العربيه القديمه، كان الدبران شخص فقير و الثريا كانت بنت جميلة، و الدبران اعجب بيها و كان عايز انه يتجوزها، لكنه كان عايز حد يكون معاه و هو بيتقدم ليها بس مالاقاش حد، فراح للقمر و طلب منه انه يحاول بقدر استطاعته انه يطلب منها انها توافق تتجوزه، فالقمر وافق و راح للثريا و تكلم معها و طلب منها ان تتجوز الدبران لكنها رفضت وقعد القمر يلح كتير عليها فردت عليه و قالت "ما اصنع بهذا السبروت(الفقير) الذي لا مال له؟".

فرجع القمر للدبران و قاله اللي حصل لكن الدبران كان مصر علي الجواز منها مع انه فقير و مايملكش الا قطيع من 20 غنمه و كلبين لحراسة القطيع، فاخذ القطيع كله عشان يقدمه للثريا علي امل انها تقبل تتجوزه، لكن الثريا رفضت برضوا.

فبقي الدبران يمشي ورا الثريا لحبه الكبير للثريا و اتمثل المشهد ده في سماء الليل، فبقي قطيع الغنم ده بيمثله عنقود نجمي بيظهر جنب نجم الدبران اسمه "القلائص" و النجمين القريبين من الدبران هما كلبين الحراسه بتوعه، و بكده بقي الدبران يدبر (يتبع) الثريا في السماء للابد و معاه قطيع غنمه لاي حته هتروحها.

و بكده بقي الدبران رمز للوفاء و الثريا بقت رمز للغدر و جيه في الامثال العربيه القديمه "اوفي من الحادي و اغدر من الثريا".


مصطلحات تم ذكرها:

*عنقود نجمي مفتوح: هي مجموعه كبيره من النجوم بيوصل عددها لأكتر من الف نجم اتكونوا من نفس السحابه النجميه و بيمتلكوا تقريبا نفس العمر، و المسافات ما بين كل نجم و التاني بتكون مسافه كبيره اكبر من المسافه بين الشمس و الأرض.

*منازل القمر: العرب زمان قسموا المناطق اللي بيمر فيها القمر في السماء إلى 28 منطقة بتفصل بينها مسافات متساوية سموها منازل القمر.