جهاز الانذار | شرح جهاز كاشف الحريق

- لا بص انت تطفي السيجاره دي حالا عشان جرس الانذار مايشتغلش قشطه.

= ايه يا عم اللي دخل جرس الانذار في الدخان الله.

- الاوضه اللي احنا قاعدين فيها دي فيها Smoke detector اهو متعلق في السقف عشان يكشوفوا اي احتمال لحريق او اي حاجه تحصل لا قدر الله.

= وده بقي هيحس بدخان السيجاره الحقيره بتعتي.

- لا يا خويا متستخفش بيه ده حساس جدااا تعالي اقولك بقي ده بيشتغل ازاي.

اولا كده في نوعين من ال Smoke detector و هما :

1 : نوع كهروضوئي

2 : نوع ايوني و ده اللي هنتكلم عنه لانه الاكثر استخداما

في الاول كده النوع الايوني ده بيتكون من :

1 : حجرة التأين و دي بيبقي فيها 0.9 ميكروكوري* من عنصر الاميركيوم 241* و هو يعتبر مصدر لجسيمات الفا موضوع بين صفيحيتين معدن بينهم فرق جهد (صفيحه موجبه و التانيه سالبه)

2 : جهاز الانذار اللي هينضرب عشان يحظرنا

الكلام بقي كله في حجرة التاين و ايه اللي بحصل فيها

بص يا سيدي اللي بيحصل ان طول ما عنصر الاميركيوم 241 عمال بيطلع في جسيمات الفا فهو بيأين جزيئات الهواء اللي بين الصفيحتيين المعدنيتيين و بالتالي هما بيتجهوا للصفيحه الموجب و بالتالي بيفضل يمر تيار معين (ثابت) بين الصفيحتين تمام كده

بس لما يعدي دخان بين الصفيحتيان بيحصل ان الدخان ده بيتجزأ لشحنات موجبه و شحنات سالبه بتساعد علي قلة الشحنات بين الصفيحتيين اللي بيأدي الي تغير قيمة التيار عن العادي فبيعمل علي تشغيل جرس الانذار بس كده

- بس كده ايه بس ياعم وهو العنصر المشع ده ماعلهوش خطر علينا يعني ولا ايه

= كنت عارف انك هتسأل السؤال ده بس احب اطمنك ان هو مالوش اضرار علينا كبشر مادام ماشمتش الماده المشعه لان ببساطه مادة الاميركيوم 241 دي بتطلع جسيمات الفا زي ماقولنا و الجسيمات دي اصلا مش بتقدر تخترق ورقه فاكيد مش هتقدر تخترق جسمنا ياعم.

- اه تمام قشطه الله يطمنك.

= حبيبي اي خدمه , اطفي السيجاره بقي عشان ماتعصبش عليك ماشي.

---

مصطلحات :

-كوري (curie ) : و حدة لقياس النشاط الاشعاعي للنواة و لما بنمسك بأدينا مقدار 1 كوري من مادة مشعه فاحنا بنمسك بكمية من المادة تمر ب 37 مليلر تحول نووي في الثانيه.

-الاميركيوم 241 : عنصر مشع يمتلك فترة نصف عمر تقدر ب 432 سنه و هو مصدر جيد لجسيمات الفا.